حاجة سخيفة ومؤلمة

.. أنا هاحزن

.. بس مش هاحزن أوي

.. وهافرح

.. بس مش هافرح أوي

.. حالة كده ما فيهاش يقين

.. ولا انت رايح للشمال

.. ولا اتجاهك لليمين

.. رافض تكون وسط البكا

.. ومش مصدق برضو ضحك المبسوطين

.. حاجة سخيفة ومؤلمة

.. الدم ينزف من هنا

.. تلاقي ناس بيعددوا

.. وناس تمام ومهيَّصين

.. حاجة سخيفة ومؤلمة

.. العدل شكل المظلمة

.. الحق شمس مغيِّمة

.. والصح أصبح بين وبين

.. تفضل كده

.. الفرحة مش بتفرَّحك

.. والحزن مبقاش يجرحك

.. ولا انت عشت كما يجب

.. ولا مُت ضمن الميتين