أنا المصري

إبن نكتة .. ودمي خفيف ..
مهما أكون مهزوم وضعيف ..
أضحك من حالي واللي بيا

حمال أسية ..
شيال هموم ..
مش بس همومي أنا لوحدي ..
والناس كمان من حواليا

إيدي تتلف ف حرير ..
بافهم في حاجات كتير ..
مش بس سبع صنايع ..
دول قرَّبوا يبقوا مِية

الفهلوة والحداقة ..
الخفة والفتاكة ..
دي حاجات بدايتها عندي ..
وإتولدت على إيديا

باصدق السياسي ..
وأخاف من قلب قاسي ..
وأدعي لكن في سري ..
ع الشلة المفترية

باتفلسف ع المواجع ..
وباسلِّم ع اللي راجع ..
وأرسمله جمل وكعبة ..
وأدعي يكتبها ليا

باحب الصوت العالي ..
والأفراح والليالي ..
والنُقطة والمجاملة ..
دول دايماً دِين عليا

عروسة المولد وحصان ..
الزينة وفانوس رمضان ..
وعيدية وبمب وصواريخ ..
باستناهم بالدقيقة والثانية

وباحب الفول م العربية ..
والراديو ساعة الصبحية ..
والبخت وكلمات متقاطعة ..
والشاي دا أهم من الميه

واشتري أصناف جديدة ..
لو بــِيه أو ع الحديدة ..
ما دام مكتوب عليها ..
واحدة والتانية هدية

من غير ما اروح مدارس ..
قلبي عارف وحاسس ..
فجرك يا بلدنا راجع ..
مهما إتأخر شوية